Filed Under : 
Mar.10,2011للأسف الشديد سوف نعاني كثيرا لكشف زيف الإدعاءات والافتراءات التي سعت كل القوى المناهضة لمصر الجديدة ان تبثها وتنشرها كذبا وزورا بهدف تشويه رمزا مصريا غاية في النقاء هو الدكتور محمد البرادعي….
“ولكن وكما عودتنا الثورة المصرية الرائعة أنها ثورة المفاجآت … فإنني بمنتهى الثقة أقول لكم…”يمكرون ويمكر الله والله خير الماكريين…
في كل محاولة قذرة تتم بهدف اجهاض ثورة أحرار مصر, نجد نتائج عكسية تصب وتخدم الثوار والثورة بشكل غير متوقع…فيزداد إيمان الثوار بقضيتهم وتزداد عزيمتهم لقهر كل هذه المحاولات بل ويزداد أعداد المؤيدين للثوار من طرف أنصار حزب الكنبة السلبي….
في كل مرة ينصرنا الله وحده من حيث لا نحتسب….
الآن وبعد هذه المقدمة, وبعد ان تابعنا كلنا حلقة برنامج آخر كلام والتي استضاف فيها يسري فودة وريم ماجد الدكتور محمد البرادعي… لابد لنا ان نعمل معا لمواجهة حملة التشويه التي طالت البرادعي منذ عام أو أكثر….والتي لا يمكن ان ننكر أنها نجحت إلى حد كبير جدا في مهمتها منذ ذلك الحين..وللأسف الكثير من بسطاء مصر من الغير مثقفين لازالوا يرددون نفس الكلام الذي نعرف جميعنا من وراؤه…
الدكتور محمد البرادعي
لذلك ارتأيت ان نبدأ جميعا حملة للتوعية الشعبية عن حقيقة الدكتور البرادعي التي لا يعلمها الكثيرون من أبناء مصر عن أحد أهم وأشرف وأخلص أبنائها
وسوف أحاول هنا ان أشرح كيف تواجه أحد المعترضين على البرادعي في الشارع بالمنطق والعقل لتجعله يراجع نفسه قبل ان يحكم عن البرادعي وتشجعه على إعمال عقله لثواني و دقائق معدودة, ليسهل عليه بعد ذلك تقبله وتفهمه ومعرفة أنه الأصلح لقيادة مصر في ثوبها الجديد ليضعها على أول طريق النهضة والتقدم الحقيقي والسريع…
لذلك سوف أقوم بسرد أهم الأسئلة والتعليقات التي نسمعها, بل سوف أقترح أيضا كيف تبدأ الحوار لكي تستطيع ان تحرر الأفكار المتأثرة بالماضي البائد…..وببساطة سأكمل باقي الموضوع بالعامية….
أولا: إذا أردت ان تفتح الموضوع, اسأل الطرف الثاني, يا ترى ترشح مين يمسك الرئاسة الفترة اللي جاية… والاجابة غالبا لن تخرج عن شخص من اثنين هما اللي متواجدين وبارزين على الساحة السياسية…يا اما الدكتور البرادعي يا إما عمرو موسى… منافسة شرسة أنا عارف 
بس بسيطة جدا ….
بس بسيطة جدا ….إذا كان رد الطرف الأخر البرادعي يبقى ميت فل وعشرة ..مش محتاج تعمل أي حاجة, غير إنك تأكد للشخص اللي بتتكلم معاه إنه اختار صح, ومفيش مانع إنك تتبادل إنت وهو ذكر محاسن اختياركم …
إذا كان الرد عمرو موسى, على طول اسأله تقدر تقولي ليه عمرو موسى؟ وغالبا هيكون الرد لأنه راجل محترم ونعرفه وسياسي محنك والكلام اللي يواريلك إن الطرف ده معندوش أي معلومات كافية عن عمرو موسى …..
وبلتالي تقوله ببساطة والله أسلوب الكلام الأسباب دي كلها في نظري تنطبق على ناس كتير مش عمرو موسى فقط, والمفروض إننا كمصريين مايكونش معايرنا في الاختيار مبنية على المعرفة المسبقة أو الشكل أو حتى الكلام المنمق اللي شبعنا منه بقالنا 30 سنة…. وتنهي بانك تقوله أما أنا ما عنديش استعداد أرشح حد عشان بيتكلم كويس… بس ممكن أرشح الشخص صاحب الموقف….زي ماحضرتك عارف الراجل موقف….وللأسف مواقف عمرو موسى في السنين الأخيرة وحتى أيام الثورة ماكانتش قد كده… ولكن مثلا مواقف البرادعي كانت كلها بتقول غير اللي الناس كلها فاهماه عنه بالغلط بعد حملة التشويه …
غالبا ماهيقولك يا راجل بارادعي ايه ده, ده عميل أمريكا وهو السبب في ضرب العراق وطول عمره عايش بره مصر وميعرفش مشاكلنا…تروح حضرتك على طول, تقوله يا راجل بجد الكلام ده, قريته فين؟؟؟ هيقولك يا إما سمعت, يا إما الناس بتقول يا إما الأهرام أو الأخبار أو الجرايد إياها……
وبكده تتأكد إن الراجل اللي قدامك محتاج توعية ….تروح جايبه من هنا وتبدأ….
قوله ماشي يا سيدي, ماتيجي نحلل كل حاجة إنت قلتها ونشوف الكلام ده مظبوط ولا لأ…
أولا: الراجل ده عميل أمريكا…
الرد: ومين بقى اللي قال إنه عميل أمريكا…جريدة الاهرام والأخبار اللي بيشتغلوا بأوامر من أمن الدولة, واللي كلنا عارفين إنهم بيطلعوا أي حد عميل, لمجرد إنه معارض للنظام القمعي بتاع مبارك…وبعدين إذا ده عميل أمريكا أُمّال حسني كان ايه؟… وأخيرا قوله أنا شخصيا استبعد تماما إنه عميل أمريكي لأنه الوحيد اللي قال لأمريكا لأ على موضوع ضرب العراق بحجة إنهم عندهم أسلحة نووية , والدليل موجود في مجلس الأمن والأمم المتحدة, واتذاع على التلفزون من كام يوم وشفته بعنية….ده مش بس كده, ده موقفه كان واضح جدا كمان ….على عكس كده حسني كان على طول بيشجع أمريكا إنها تضرب العراق وسمحلهم إنهم يعدوا من قناة السويس, وحتى لو كان حسني ضد الموضوع ده, عمرنا ماسمعنا حتى ولو تصريح واحد يقول إنه مش موافق على ضرب العراق… فببساطه كده لا يمكن ان اكذب عيني ووداني وانا باسمع البرادعي وهو بيقول في الأمم المتحدة إن العراق مفيهاش اسلحة دمار شامل وأي أسلحة نووية وأصدق الاعلام المصري الكذاب اللي كان شغال بأوامر من أمن الدولة…
الفيديو اللي بيثبت إن البرادعي كان ضد ضرب العراق أهو: وممكن تدي للطرف التاني اسمه لو حبيب يتأكد بنفسه….
اتفرج من الدقيقة 9:35
وكمان تروح مكمل عليه وتقوله إنت عارف البرادعي أخد نوبل للسلام إزاي وليه؟
عشان موضوع العراق …وانه كان معترض على الإستخدام العسكري ضد العراق, وخصوصا إن التفتيش اللي عملته الوكالة الذرية أثبت إن العراق مفيهوش نووي ….والسبب ده مذكور في أسباب الحصول على جايزة نوبل للسلام…. وده كمان دليل تاني على كذب وافتراء النظام السابق على البرادعي… لمجرد إنه كان معارض لنظام حسني مبارك….
كده تبقى ضربت عصفورين بحجر واحد…اثبت إن البرادعي مش عميل, وفي نفس الوقت صححت الأكذوبة اللي بتقول إنه هو اللي ورا ضرب العراق…
نيجي دلوقتي لموضوع إنه طول عمره عايش بره مصر, وميعرفش مشاكلنا فـبالتالي مايصلحش إنه يحكمنا…..
الموضوع ده ليه شقين في الرد….
الشق الاول – شق تهكمي: تروح رامي على طول “على أساس إن حسني مبارك كان عارف مشاكل المصريين بما إنه قاعد في وسطيهم طول عمره”.
والشق التاني: الكلام اللي بجد: ببساطة يا أستاذي الفاضل مشاكلنا مهياش أسرار عسكرية ماحدش عارفها ولا شايفها غير اللي عايش جوه مصر….ده احنا والحمدلله النظام اللي فات كان مخلي فضيحتنا بجلاجل…وكل العالم كان عارف مشاكلنا وشايفنا…واديله مثل بسيط… قله مش حضرتك أو أي حد لما بيسافر بره بيلاحظ فرق النضافة في الدول اللي حوالينا بسهولة جدا… هيقولك طبعا.. تروح على طول قايله أهو تخيل بقى نفس الاكتشاف ده بيكون مصير أي حد جاي مصر من الدول النضيفة دي على مصر… بس بالشقلوب .. بيكتشف قد ايه احنا بلد متخلفة, ومهرجلة ومش نضيفة, وفقيرة, وكل حاجة حلوة
وتدعم فكرتك بانك تقوله ده يمكن الموضوع ده يفرق معانا, قوله يا راجل دحنا من كتر ما احنا عايشين في الزبالة اللي حوالينا, مبقيناش فاكرين النضافة شكلها ايه….واتعودنا على التلوث وانعدام النظام…
يعني بإختصار كده حضرتك مشاكل مصر بتكوون أوضح بكتير للي عاش بره وشاف الدنيا النضيفة شكلها ايه …ويكفيك يومين تلف فيها حواري مصر والعشوائيات وتركب فيها الدائري أو المحور…وإنت تعرف كل مشاكل مصر ايه, وتبدأ تشتغل على حلها….
المشكلة الحقيقية في إنك تشوف المشاكل وتحلها, مش تبقى متأكد من وجود المشاكل ومبتعملش حاجة عشان تحلها, لانك ببساطة مشغول في سرقة ونهب البلد …
وفي الأخر تقوله حاجتين أساسيتين عشان تنهي الحوار…
أنا بصراحة مع اللي نزل الشارع وضحى وكان مستعد إنه يتبهدل عشان يثبت إنه صاحب مبدأ ماحادش عنه في أي وقت من ساعة مارجع مصر بالرغم من كل حملات التشويه اللي طالت سمعته وشرفه وتاريخه بالتزوير…
ومش مع اللي فضل لغاية آخر يوم في الثورة, مستني يشوف الكفة هترجح فين عشان يقتنص الفرصة ويروح مع الطرف الكسبان…ببساطه عمرو موسى بلسانه قبل الثورة بكام شهر قال أنا هارشح حسني مبارك للرئاسة, وده غريب, لأنه لو كان ناوي يرشح نفسه زي ما أعلن اليومين اللي فاتوا كان الأولى بيه إنه يرشح نفسه في وجود حسني مبارك….ولكن إنه يستنى لغاية لما يمشي وبعدين يرشح نفسه علامة استفهام مش مفهومة….
النقطة الأخيرة مصر مش محتاجة لأشخاص شاطرين جدا في العلاقات الخارجية زي عمرو موسى….بل بالعكس, احنا محتاجين اللي يعرف يساعدنا ننتقل لإننا نكون دولة عظمى من تاني ويهتم ببنى مصر من جوه….
ومصر مش محتاجة واحد شاطر جدا في الكلام زي عمرو موسى بس احنا فعلا محتاجين راجل اداري من الدرجة الأولى يعرف يحول بلدنا إلى بلد مؤسسات بحق وحقيق عشان البلد هي اللي تنضف نفسها بنفسها, والنظام الجديد هو اللي يفرز الكفاءات والناس هي اللي تختار اللي يمثلها بجد….وعشان كده, البرادعي يقدر يعمل كده أكتر من عمرو موسى لأنه راجل صاحب فكر قبل مايكون راجل بيتكلم بلباقة….
مصر مش محتاجة زعماء نحبهم ونعمل منهم فراعنة جداد….مصر محتاجة نظام كامل يكون العدل هو المعيار الوحيد للإختيار والعمل هو السبيل الوحيد للنهضة والحرية مكفولة لكل الناس الصغير قبل الكبير….وده لا يمكن يحصل إلا في ظل دولة مؤسسات القانون فيها هو اللي بيحكمها مش الأشخاص حتى ولو كانوا ملائكة….
ولو في حد تاني زي البرادعي وعنده نفس التوجه أنا مستعد أختاره لإن الفكرة مش لازم تكون مبنية على أشخاص ولكن لازم تكون مبنية على برامج وأهداف….ولازم اختيارنا يكون عقلاني بنسبة 100% والعاطفة ملهاش أي تأثير في اختيارنا عشان نختار اللي يقدر يخدم مصلحتنا في البلد دي كمواطنين, مش اللي بنحبه أكتر أو اللي شكله أحلى, ولا اللي طريقة كلامه جميلة, ولا كل العوامل العاطفية اللي رجعتنا ورا 50 سنة ….
في النهاية إذا مشفتش الحلقة ممن تضغط هنا وإنت تشوف ملخص لأهم النقاط اللي قالها البرادعي, وفي نفس الوقت هتلاقي كل الفيديوهات بتاعت الحلقة بالترتيب
Related posts:
You can leave a response, or trackback from your own site.
كاتب الكلام ده هو صاحبه
وعمرو موسي اجدر
أحلى حاجة في الديمقراطية هي الإختلاف….
أنا مع البرادعي وحضرتك مع موسى وانا احترم اختيارك….
والفيصل بينا هيكون الصندوق…
ويارب الأجدر فعلا هو اللي يكسب….
تعالى نتنافس عشان الأجدر وبلدنا أكيد هتكون الأفضل
كلام مظبوط وهايل جداا ومن اكتر الاسباب خلتني احترمو اكتر انو متواضع ومعتقد باهمية العمل الجماعي. دايماً يقول أنا مقدرش أعمل ده لوحدي محتاج الشعب محتاج الشباب. علطول بيعتبر نفسه لاعب ضمن فريق مش القائد الملحم اللي عامل سبع رجالا في بعض
وانو راجل بيقدر الشباب وبيفهم في التكنولوجيا ودي كان أدوات اللي اعتمد عليها في ظهوره في الأول أصلا. يعني باختصار نظام تاني خالص عن اللي عرفناه الستين اللي فاتت
مظبوط جدا الكلام….
علشان يبقي الكلام كله صح في نقطة واحدة مختلف معاك فيها و هيا ان عمرو موسي صرح و قال انه كان هينتخب حسني لان الدستور مكنش هيخلي حد تاني يترشح غير جمال و الراجل قال انه شايف ان حسني احسن من ابنه …. كده الراجل مغلطش
ممكن تكتب ان عمرو موسي جه التحرير و طالب الناس انها تمشي لان مطالبها اتحققت و علي العكس البرادعي …… أرجوك تضيف النقطة الثانية و تمسح الاولي
كلامك مظبوط يا محمد….فعلا عمرو موسى قال الكلام ده….بس من وجهة نظري طالما هو في فترة من الفترات قال أرشح مبارك برغم كل الفساد اللي حواليه يبقى برده معندوش الجرأة إنه حتى يسجل اعتراضه على نظام مبارك الفاسد… وبالتالي هو لا يصلح لأن يعبر عن مصر الثائرة. وهو لم يثور على مصر الفاسدة في الأساس عكس البرادعي اللي عبر عن ذلك بمنتهى الوضوح… ….
والدليل اللي حضرتك قلته وانا متفق معاك فيه إنه نزل التحرير عشان يطالبها تمشي….وده من وجهة نظري دليل ادانة آخر إنه كان مع النظام السابق حتى آخر لحظة…..
أنا شاكر لمشاركتك جدا….