Filed Under : 
Aug.13,2011كل الناس اللي بتلعن الثورة وبتشيلها مسئولية تردي أوضاع البلد, وعمالين يقولوا الثورة خربت البلد… على أساس إنها كانت سويسرا مثلا واحنا رجعناها مصر تاني…
ماشي فعلا البلد حالها بقى زفت ويمكن أسوأ من قبل الثورة…
بس سؤال بسيط:
هي الثورة هي حكمت مصر الست شهور اللي فاتوا؟
طيب ليه مابننتقدش المجلس العسكري اللي حكم مصر ونشيله مسئولية تردي الأوضاع, بدل ماعمالين نلوم الثورة اللي ماحكمتش أصلا؟؟؟
بالمناسبة الثورة كان عندها حلول ثورية سريعة لكل أزمات مصر الأمنية والاقتصادية الخ, ولكن المجلس كان بيرفض كل الحلول وبيفرض حلوله اللي شايفها على البلد كلها…
ولسة بنلوم الثورة…
عايزين تلوموا الثورة؟ مفيش أي مشكلة… خلوها تحكم وبعدين لوموها براحتكم…
We Stand Together
أنا أعتقد بل أؤمن إن كل اللي بيلوم الثورة دلوقتي, هو واحد بيحب مصر فعلا ولكن في نفس الوقت معندوش أي استعداد انه يقدم أي حاجة علشانها… عارفين ليه… لأن مصلحة مصر للأسف ممكن تتعارض مع مصالحه الشخصية….وعشان نتعرف أكتر على الناس دي وتشوف هل انت منهم ولا لأ…هاحطلك بعض من صفاتهم
…هو شخص عايز دولة القانون, ولكن مفيش مانع من بعض الاستثناءات ليه ولأسرته الكريمة …
شخص عايز أمن في الشارع, ومفيش مانع من قمع واعتقال وتعذيب بعض الناس في سبيل انه يحس بالأمن ده…
شخص عايز حق التظاهر والاعتصام يكون مكفول للجميع, وماعندوش مانع من فض مظاهرة أو اعتصام بالعنف علشان هو يلحق يروح مشاويره مرورا بالتحرير…
شخص عايز عدالة اجتماعية وحد ادنى للأجور, ولكن بدون الاقتراب من الحد الأعلى اللي هو ممكن يكون أحد المستفيدين منه…
شخص عايز الناس تحترم المرور وهو أول واحد بيمشي عكسي وبيكسر إشارة وبيقف صف تاني…
شخص عايز البلد تنضف, وهو بيرمي الزبالة في الشارع من شباك عربيته…
شخص عايز مساواة بين الناس, وهو معندوش أي مشكلة انه يتعامل معاملة مميزة في أي مصلحة حكومية أو أي مكان خدمي…
شخص عايز اعلام حر ومستقل ومعندوش أي مشكلة يصدق التلفزون المصري الحكومي لما يقول نفس الأكاذيب تاني…
شخص مش عايز حد يتهمه بالخيانة والعمالة وهو معندوش أي مشكلة انه يصدق نفس الاتهامات على غيره من الناس لمجرد انه مصدق الاتهامات دي لمجرد إنها طالعة من جهة سيادية….انما متقولش قانون ولا أدلة ولا بتنجان بقى …
شخص اتعود انه يلعب دور المفعول به والمفعول فيه أحيانا …اتعود إن الحكومة بتعمله كل حاجة …شخص يحب إن حد تاني ياخد مسئولية القرارات الإصلاحية اللي ممكن تأثر على مستقبله الشخصي ومستقبل أولاده…شخص قصير النظر, لا يريد المشاركة في بناء بلده ولكن يفضل ان يقوم حد آخر بلعب الدور ده بالنيابة, وبالتالي يصبح هو غير مسئول عن أي قرارات بل بالعكس يمكنه انه ينتقد براحته ويطلعلك كل القطط الفطسانة, ويمكن كمان يطلعلك كل أنواع العقبات, ويطلع عينك وعين اللي خلفوك …ايه يعني مالوش نفس يعني…
شخص أناني لا يرى سوى مصلحته ولا يرى كل الأمثلة الواضحة وضوح الشمس, للفقر والجهل اللي بيعاني منه أكتر من نص الشعب المصري المغلوب على أمره…
شخص اتعود إن ليه كبير, واللي ملوش كبير نشتريله كبير…
شخص يعشق الندب والشكوى والفلسفة والكلام ولكن لا يملك ارادة حقيقية للتغير …
أنا لا ألوم فقراء والبسطاء هذا الوطن اللي فعلا ابتدوا يزهقوا من تردي الأوضاع بعد الثورة, لإن في الأصل هذه الثورة قامت من أجلهم….بل على العكس تماما…
ولكن ألوم أبناء الطبقة المتوسطة وما فوقها من المتعلمين والمثقفين اللي زهقوا هما كمان….النهاية….واضح إننا نجحنا في ازالة رأس النظام وبعض معاونيه, ولكننا لازلنا في صراع مع نظام مبارك اللي لسة معشش جوانا ومفيش حد فينا عايز يتنازل وينحي مبارك الصغير اللي جواه علشان مصر…
Related posts:
You can leave a response, or trackback from your own site.
